Apr 27, 2017
93 Views
0 0

రైతులకు పాదాభివందనాలు : సీఎం కేసీఆర్

Written by

రాష్ట్రంలోని వివిధ ప్రాంతాల నుంచి 10 వేల ట్రాక్టర్లతో ప్రగతి నివేదన సభకు వచ్చిన రైతులందరికీ శిరసు వంచి పాదాభివందనాలు చేస్తున్నానని ముఖ్యమంత్రి కేసీఆర్ తెలిపారు. ప్రగతి నివేదన సభా వేదికగా సీఎం ప్రసంగించారు. ఎండకు భయపడకుండా తరలివచ్చిన ప్రతి ఒక్కరికీ కృతజ్ఞతలు తెలిపారు. ఏ ఒక్క వర్గాన్ని విస్మరించకుండా అందరి సంక్షేమమే ధ్యేయంగా ముందుకు వెళ్తున్నామని స్పష్టం చేశారు. మూడేళ్ల పరిపాలనను దిగ్విజయంగా పూర్తి చేసుకున్నామని తెలిపారు. బంగారు తెలంగాణ దిశగా ముందుకు సాగుతున్నామని ఉద్ఘాటించారు. రాష్ట్రంలో ప్రతి ఒక్కరి ముఖంలో చిరునవ్వు చిందించాలనేదే తన ఆశయమన్నారు. దేశంలో ఎక్కడా లేని విధంగా అభివృద్ధికి ప్రాధాన్యత ఇస్తున్నామని స్పష్టం చేశారు.

రాష్ర్టం ఏర్పడిన వెంటనే కరెంట్ సమస్యను అధిగమించేందుకు ప్రయత్నం చేశాం. రాష్ర్టం ఏర్పడిన ఆరు నెలలు గడవకముందే విద్యుత్ సమస్యను అధిగమించామని చెప్పారు. కరెంట్ సమస్య అధిగమించడంతో పరిశ్రమలు మూడు షిఫ్టుల్లో పని చేస్తున్నాయని చెప్పారు. ఆ తర్వాత పరిపాలన దృష్ట్యా జిల్లాల పునర్విభజన చేపట్టామని తెలిపారు. జిల్లాల విభజనతో ప్రజలకు పాలన చేరువైందన్నారు. పాలనసంస్కరణల కోసం కొత్త జిల్లాలను ఏర్పాటు చేశామన్నారు.

గ్రామీణ ఆర్థిక వ్యవస్థ పరిపుష్టం చేసే దిశగా ముందడుగు వేస్తున్నాం. దీనిలో భాగంగా గొల్ల, కురుమ, రజక, నాయి బ్రహ్మణ, కుమ్మరితో ఇతర కులాలను ఆదుకుంటున్నామని తెలిపారు. రూ. 40 వేల కోట్లతో అభివృద్ధి కార్యక్రమాలు అమలు చేస్తున్నామని చెప్పారు. గ్రామగ్రామానికి మంచినీళ్లు అందించేందుకు ప్రయత్నిస్తున్నామని పేర్కొన్నారు. ఈ క్రమంలోనే మిషన్ భగీరథకు శ్రీకారం చుట్టామని తెలిపారు. వచ్చే ఏడాది చివరి నాటికి ఇంటింటికీ మంచినీరు అందిస్తామన్నారు. రూ. 43 వేల కోట్లతో మిషన్ భగీరథ కార్యక్రమం నిర్విరామంగా కొనసాగుతుందన్నారు.

గ్రామీణ ఆర్థిక వ్యవస్థను టీడీపీ, కాంగ్రెస్ పట్టించుకోలేదన్నారు. గొర్రెల పంపిణీలో లంచాలు, పైరవీలు ఉండవన్నారు. అర్హులైన వారికి మాత్రమే పంపిణీ జరుగుతుందన్నారు. మత్స్య కార్మికుల కోసం బడ్జెట్ లో రూ. వెయ్యి కోట్లు కేటాయించామని గుర్తు చేశారు. రాష్ర్టంలో నాయి బ్రహ్మణులను ఆదుకుంటున్నామని తెలిపారు.

ఉమ్మడి రాష్ట్రంలో 4 లక్షల మెట్రిక్ టన్నుల సామర్థ్యం ఉన్న గోదాములు మాత్రమే ఉండగా.. దాన్ని 21 లక్షల మెట్రిక్ టన్నులకు పెంచేందుకు చర్యలు చేపట్టామని తెలిపారు. గత ప్రభుత్వాల హయాంలో ఎరువుల కొరత ఉండే.. కానీ ఇప్పుడు ఎరువుల కొరత తీర్చామని ప్రకటించారు. రైతులకు రెండు పంటల కోసం ఎకరానికి రూ. 4 వేల చొప్పున వచ్చే ఆర్థిక సంవత్సరం నుంచి ఇస్తామని చెప్పారు. మే 15 లోగా తొలి పంటకు, అక్టోబర్ 15 లోగా రెండో పంటకు నిధులు రైతుల ఖాతాలో జమ చేస్తామని ప్రకటించారు. గ్రామ రైతు సంఘాలు ఏర్పాటు కావాలని సూచించారు. గ్రామ, మండల, జిల్లా స్థాయి రైతు సంఘాలు ఏర్పడాలన్నారు.

తెలంగాణను క్రాప్ కాలనీలుగా విభజిస్తామని తెలిపారు. రైతుల వెంట కేసీఆర్ ఉన్నారని భరోసానిచ్చారు. మనం పండించే పంటకు మనమే ధర నిర్ణయించాలని సూచించారు. పట్టుబట్టి జట్టుకడితే మన పంటకు మనమే ధర చెప్పే పరిస్థితి వస్తుందన్నారు. రైతుల విషయంలో రాజీపడేది లేదన్నారు. రైతు రాజ్యమే ధ్యేయంగా తమ పాలన ఉంటుందని ఉద్ఘాటించారు. విద్యుత్, నీళ్లు, పెట్టుబడి ఉచితంగా ఇస్తామని స్పష్టం చేశారు. రాష్ర్ట కర్షక సమాఖ్యకు బడ్జెట్ లో రూ. 500 కోట్లు కేటాయిస్తామని ప్రకటించారు.

Article Categories:
News · Telangana

Leave a Reply